في

احتواء !

” بابا .. ايه رأيك في الفستان ده “

” أنا حلوة ..متقولش عليا يا وحشة انت اللي وحش “

” بصي يا ماما .. المس عطيتني 10 من 10 “

دايما بنسمع الجمل البسيطة دي اللي بتحمل رسايل نفسية كبيرة جدا من اخواتنا .. قرايبنا أو حتي الاطفال اللي ماشية في الشارع مثلا ..

وكالعادة ممكن نطنشهم أو ابتسامة خفيفة عابرة كدة ونمشي ، وممكن مناخدش بالنا ليهم أصلا

ويكبر الطفل ده وهو عنده نقص أو خلل في نسبة الاحتواء اللي المفروض كان ياخدها من أقرب الناس ليه زي أهله أو اصحابه مثلا ..

هي لما بتروح تقولك ” ايه رأيك في الفستان ده “

هي مستنية منك تقولها مثلا ” ايه الجمال ده ، ما شاء الله جميل جدا وانتي أجمل “

هي مش عايزاك تشوف الفستان ، هي عايزاك تشوفها هي .. عايزاك تبتسم لها وتحسسها انها موجوده وإنك شايفها ومهتم بيها ومتقبل وجودها في حياتك كبنت أو كأخت أو كزوجة مستقبلا ان شاء الله ..

طيب الطفل ده أو الطفلة دي كبرت ومأخدتش من أهلها نسبة الاحتواء والاهتمام اللازم عشان تكون متزنة نفسيا ..تفتكر هتعمل ايه ؟

هتدور على الاحتواء ده بره .. تشوف حد يهتم بيها ويحتويها حتى لو هتدخل نفسها في “علاقة سامة” -زي اللي اتكلمنا عليها في مقال سابق-وغالبا ترتبط بشاب من بتوع اليومين دول اللي هيشتغل نقصها وهيكمل وهم ويلعب على الثقب النفسي ده ..

يقوم بقاا يوصلها رسايل زي :

” انا بحبك ..أنا مش هسيبك ابدا .. انا هكون جنبك دايما و هكون سندك اللي ترمي عليه كل همومك ومشاكلك ” ..

تقوم هي تفرح وتحس انها لقت الحاجة اللي ناقصاها في الشخص ده وتفتحله قلبها وتسلمله مفتاح خزنة أسرارها وثقوبها النفسية ..وطبعا عشان الشخص ده داخل يتسلى مش أكتر يقوم يلعب بيها وبمشاعرها شوية ويهرب !

وتقع البنت في صدمة نفسية شديدة تانية نتيجة انها كسرت حدود الله ..

نيجي بقى للطفل اللي كبر من غير ما يسمع كلمة حلوة من أهله أو حد يهتم بيه ويحسسه ان ليه قيمة ووجود في حياة اقرب الناس ليه ..

يقوم يعمل ايه ؟

يظبط نفسه ويلبس كل يوم اللي ع الحبل ويكلم بنات بعدد شعر رأسه ويقلم دي يقولها ” بحبك ” ودي يقولها ” أم عيالي ” والاخيرة عشان معرفش يدخلها بالمداخل دي يقوم يضحك عليها ويقولها ” انا بس حابب أتعرف عليكي الاول لحد ما أخلص دراستي وهاجي أخطبك علي طول والله ” وغالبا بتقع البنت ضحية لشخص مضطرب نفسيا بيدور علي شخص ياخد منه اللي ناقصه فترة معينة وبعدين يهرب

ويدور علي حد تاني وتالت ورابع ..وبرضه النقص ده مش هيكمل لان المبدأ بتاعه في الأساس باطل وما بني على باطل فهو باطل ” .

عارف اني طولت عليك بس حابب أوصلك نقطة مهمة أنا شخصيا كانت ناقصاني جدا قبل ما أقرأ في كتب علم النفس والطب النفسي ..

قرب من أخوك ..أختك الكبيرة أو الأصغر منك .. احتويها ..لما تيجي تحكيلك عن موقف حصلها في الحضانة اتفاعل معاها وحسسها انها موجودة في قلبك قبل ما تكون موجودة قصاد عينك ..

لما تيجي تقولك ” المس عطيتني 10 من 10 ” افرح وقولها ” ما شاء الله عليكي يا جميلة ” جيبلها أي حاجة كهدية عشان تشجعها حتى لو كانت حاجة بسيطة جدا  ..

لما تلاقي أخوك الكبير أو الصغير منعزل أو بعيد عنك قربله انت ..حسسه ان وجوده فارق معاك ..

في النهاية كلنا مرضى ..

كلنا فينا ثقوب نفسية لا يعلمها الا الله .

” ولا نملك أكثر من أن نهون على بعضنا الطريق ! “

ابتسموا ..سامحوا ..ساعدوا ..تجاوزوا وتخطوا ..

كونوا عابري سيبل في قلوب الجميع ..

#مروا بسلام يرحمكم الله

تم إنشاء هذا المنصب مع لطيفة وسهلة استمارة التقديم. إنشاء وظيفة الخاص بك!

تقرير

ماذا تعتقد ؟

تعليقات

Please Login to Comment.

Loading…

0

مروا بسلام يرحمكم الله !

من الأسس الإنسانية