في

كل الخروجات الي تقدر تخرجها من اول 50 جنيه او اقل كمان

ازاي تقضي اسبوعين الاجازة من غير ما يروحوا عليك او تحس بملل ؟ازاي متبوظش اجازه نص السنه ؟ كام مره الاجازه بتاعه نص السنة ضاعت عليك ؟طيب ايه رائيك تستفيد من الإجازة المره ديه وتخرج وتاخد بريك من الدنيا والدراسه والشغل وترجع بعد الاجازه متحمس للدنيا ؟انا عارف انك في السنين الي فاتت كان نفسك تعيش الاجازه صح بس طلعتلك مشاكل زي الفلوس والوقت واصحابك اللي مش تتفقوا علي حاجه واحده صح مش كده بس اوعدك الاجازه ديه مش هتضيع منك زي الي قبلها البوست ده اهم بوست هتحتاجه علشان تعرف تستفيد بالاجازه هتلاقيني هنا نجمع لك كل اللي محتاجه علشان تعرف هتخرج فين وبكام ؟لو معاك فلوس قليله جبتلك كل الخروجات الي تقدر تخرجها من اول 50 جنيه او اقل كمان …مين قال ان ال 50 جنيه ميعملوش حاجه طيب شوف معايا كده اول حاجه تقدر تروح الاهرامات خصوصا في الشتا الجو هناك مناسب جدا انك تروح الاهرامات هناك مش مش هتشوف الاهرامات لا ده انت ممكن تخش كمان جوه الهرم نفسه وأبو الهول وتتصور صور كويسه جدا وتركب حصان أو جمل وتخش سفينة خوفو ..سعر تذكرة الاهرامات ب 10 جنيه للطلاب و30 جنيه للمصريين والاهرامات مفتوحه كل يوم من 7 الصبح لغايه 5 المغرب ..لو مش عايز تروح الاهرامات

ممكن تروح قصر عائشة فهمي في الزمالك وعلي فكره الدخول مجانا بالبطاقه بس ..بس خد بالك علشان هو مفتوح للزيارة لغاية 6 فبراير بس .. كل يوم من 9 الصبح ل 9 بليل ما عدا الجمعه . هناك هتلاقي لوحات نادرة جدا وكمان القصر على النيل وهتعرف تاخد شويه صور جامده جدا وممكن بعد ما تخلص تروح تتمشى في الزمالك … عنوان القصر : ش عزيز أباظة – الزمالك – القاهرة قدام فندق ماريوت في شارع 26 يوليو عند منزل كوبري 15 مايو

عندك كمان قصر المانسترلي .. هو عبارة عن تحفة معمارية وأثرية والتذكره ب 10 جنيه بس والطلاب ب 5 جنيه القصر ده اتصور فيه مشاهد كتير في الافلام يعني هتعرف تاخد شوية صور حلوه وكمان القصر في قلب النيل وده المكان اللي كان فيه مقياس النيل .. مواعيد الزيارة من 9 الصبح ل 4 العصر .. العنوان : المنيل اقرب محطة مترو مارجرجس ( شارع البحر الصغير قصاد سينما فاتن حمامه )

لو ملكش في كل اللي فات يبقى اكيد هتحب تشوف عرض التنورة بيكون كل سبت واتنين واربع من كل اسبوع والتذكرة حوالي 12 جنيه والعرض بيكون ساعه ونص وعلشان تروح اركب اي حاجه رايحه كوبري الأزهر وتنزل عند الغورية قدام جاد بتاع الفول .

طيب فاكر فيلم الفيل الازرق عارف كان أغلب مشاهد الفيلم متصورة فين ؟ المكان ده هو متحف جاير أندرسون ( بيت الكريتلية ) بيت في السيدة زينب جنب مسجد ابن طولون عنوان المتحف شارع قدري بجانب مسجد ابن طولون السيدة زينب التذكره ب 15 جنيه و للطلاب ب 5 جنيه من 9 الصبح ل 4 العصر

خد كمان عندك المتحف الجيولوجي هتلاقي هناك هيكل عظمي لديناصور حقيقي واحجار كريمه و قطعه من القمر وعينات للاحجار اللي بتحتوي على دهب . المتحف مفتوح كل يوم من 8 ونص الساعه 2 ونص ماعدا الجمعه والسبت تذكرة الدخول 5 جنيه بس

بمناسبة المتاعب بقي خد عندك متحف محمد علي بالمنيل التذكره ب 20 جنيه من 9 الصبح ل 4 العصر اقرب محطه مترو السيده زينب فيه هناك حديقة تضم نباتات نادرة جدا ودخول الحديقة مجاني وفيه لوحات وحيوانات محنطة والمكان جميل جدا

عندك كمان متحف ذاكرة السينما الدخول مجانا مواعيدها مسائيه من 4 العصر ل 8 مساء من الاحد للخميس هناك بقي هتلاقي فيه كاميرات تصوير قديمة وهتلاقي معدات تصوير قديمه وسيناريوهات وشرايط افلام الابيض والاسود

وطبعا المتحف المصري في التحرير التذكرة ب 10 جنيه للطلاب وهناك هتلاقي اثار كتيره وجميله جدا غير أن المتحف تصميمه حلو جدا ومفتوح كل يوم من 9 الصبح ل 5 المغرب وكمان المتحف المصري الكبير هيكون تذاكر الطلاب ب 30 جنيه والمصريين ب 60 جنيه واول ما يتم تحديد معلومات عن افتتاحه هعدلها هنا في البوست

كفايه متاحف بقي ونخش علي حاجات تانيه عندك المركز الدولي للبولينج تقدر هناك تلعب بولينج ب 30 جنيه وفيه هناك كمان بلياردو وبينج بونج وتذكرة الدخول ب 20 جنيه عنوانه صلاح سالم – شارع الاستاد البحرى خلف بانوراما اكتوبر .

ولو ملكش في اللعب يبقي ليك في انك تتمشى ف ممكن تتمشي علي كوبري الجامعه الجميل والهادي وتروح تركب الاتوبيس النهري وليه موقف هناك جنب كوبري الجامعه و هتركب ب 3 جنيه أتوبيس نهري هيوصلك عند ميدان التحرير وبعد كده تمشي وتركب المترو وتنزلي محطه مترو باب الشعرية وتطلع على شارع المعز تقضي باقي اليوم هناك وتتفرج علي القاهرة القديمة والآثار بتاعتها وتتصور صور حلوه وتاكل حاجات حلوه وتطلع كمان كمان علي الحسين جنب شارع المعز تروح تشوف جامع الحسين وتقعد تتغذى هناك احلي اكل و هتنبسط جدا .

طيب بعد ما تاخد الاجازه وتخرج وتتفسح في اي مكان في الاماكن الي فوق ديه تفتكر كده نهايه ال 50 جنيه لا طبعا عندك لسه معرض القاهرة الدولي للكتاب من 22 يناير وحتى ٤ فبراير 2020 هناك المعرض مش مجرد كتب وبس حقيقي المعرض مليان ندوات وفعاليات رهيبه وفيه كمان عروض مسرحية وشعر وهتلاقي هناك ناس مشهوره كتير وحفلات توقيع للكتاب ومحلات اكل كتير من اول الكشري لغاية السوشي هو صحيح المعرض في التجمع الخامس لكن فيه اتوبيسات كتيره بتودي ليه من أماكن مختلفة أهمها ميدان التحرير هتلاقي اتوبيسات باستمرار يوميا وعلي مدار اليوم وعلى طول بتتملي وتتحرك على المعرض وبتوصل في اقل من 20 دقيقة عن تجربه السنه الي فاتت وبحوالي 5 او 10 جنيه مش متذكر اوي لكن انا قريب هكتب بوست كامل عن معرض الكتاب فتابعونا هتلاقوا البوست مفصل وشرح كل حاجه عن المعرض بالاضافة الروايات الجديدة والكتب الجديدة ودور النشر ومتوسط أسعار الكتب وحاجات تانيه كتير عن معرض الكتاب

طيب بما ان ديه اجازه نص السنه الدراسيه صناع السينما بيعتبروا ان الفتره ديه بتكون موسم قوي لنزول افلام جديده والموسم ده هيكون فيه 8 افلام نازلين في السينمات فيلم لص بغداد وده من تمثيل محمد امام وياسمين رئيس وده فيلم كوميدي يدور احداثه عن البحث عن كنز مفقود في شكل كوميدي جدا

وعندك فيلم يوم وليلة من تمثيل خالد النبوي وأحمد الفيشاوي تدور أحداث الفيلم عن البحث في بعض القضايا الاجتماعية، التي تتعلق بأزمات الفقراء داخل مولد السيدة،

فيلم الفلوس بتاع تامر حسني وزينة وخالد الصاوي وأحمد السقا .. تامر حسني طلع نصاب في الفيلم وكله مغامرات كوميدية

اما بقي لو ليك في الافلام العميقة يبقى تخش فيلم شريط 6 بتدور أحداثه حول طبيب أمراض نفسية ويحاول حل قضايا الشباب النفسية من تمثيل وفاء عامر وطارق عبدالعزيز

وخد عندك كمان فيلم صاحب المقام من تمثيل يسرا واسر ياسين وصلاح عبدالله بيتكلم عن شاب بيحصله مشاكل وأمله الوحيد امرأة من أولياء الله الصالحين

وعندك فيلم بنات ثانوي بيتكلم عن فترة المراهقة عند بنات المرحلة الثانوية تمثيل جميلة عوض ومي الغيطي

فيلم كينج سايز للنجم الكوميدي محمد هنيدي

وآخر فيلم هو فيلم اشباح أوروبا من بطولة هيفاء وهبي وأحمد الفيشاوي ومصطفي خاطر بيتكلم عن 6 اخوات توأم ينشأ ما بينهم صراعات في المستقبل

خلصنا بقي الخروجات ام 50 جنيه وافلام السينما التي تكون متاحة في كل مكان من تذاكر بتختلف من سينما تانيه بدايه من اول 35 جنيه لغاية 150 جنيه او اكتر

نخش بقي علي الناس اللي معاها فلوس كتيرة بتحب السفر في البوست الجاي هنتكلم عن ازاي تقضي يوم صد رد في اسكندريه ب اقل من 200 جنيه وعن السفر ودهب وسانت كاترين والاقصر واسوان عروض السفر هناك والحاجات الي ممكن تعملها في السفريات ديه وكمان بضيف للبوست ده اماكن للفسح والخروجات في القاهرة والجيزة للناس اللي صعب انها تسافر ومعاها فلوس برضو .. بالإضافة لكل الايفنتات اللي هتكون موجوده فى القاهره والجيزه والاسكندريه في فتره الاجازه لو عندكم اماكن تانيه للخروج بأقل من 50 جنيه او 100 جنيه تقدروا تحطوا في الكومنتات والي حابب يسأل عن تفاصيل اكتر لاي حاجه من الي فوق يقول في كومنت سؤاله وانا هبعتله لينك او ارد عليه بتفاصيل اكتر تقدروا تشوفوا صوره لكل مكان من الاماكن ديه في البوست مكتوب على كل صورة هي في اي مكان وكمان في الكومنتات هحط لكم لينك جروب تقدر تسأل عليه عن ازاي توصل للمكان ده من منطقتك ولو عجبكم البوست ياريت تعملوا شير وتقولوا تحبوا اضيف ايه للجزء التاني في البوست جنب خروجه السفر في الإجازة

 

تم إنشاء هذا المنصب مع لطيفة وسهلة استمارة التقديم. إنشاء وظيفة الخاص بك!

تقرير

ماذا تعتقد ؟

Written by juba

تعليقات

Please Login to Comment.

Loading…

0

وجهة نظر: كورونا تتحدث عن نفسها بقلم نسمة

مدرس خصوصي تم إصابته بفيروس كرونا