في

عريس فى الطريق

لو كانت الافلام تجسد الواقع فعلا فأكيد افلام زمان جسدت الواقع بردو

طب ايه الواقع الحلو اللى جسدته افلام زمان 

الجواز 

ايوة الجواز بس مش الجواز كعلاقات لأ الجواز تكاليف 

في بعض الأفلام كنت اشوفهم بيروحوا يخطبوا البنت وبعد شهر بالكتير يعملوا الفرح وساعات بيخلوه الخميس الى بعد الخطوبة كمان لو العريس والعروسة جاهزين 

وحفلة صغيرة ع الضيق كدة فى البيت فيها اهل العرسان المقربين اوى والصحاب الانتيم وجاتوه تقريبا وازازة الشربات اللى هى بتكفى المعازيم كلها دى 

وخلاص توتة توتة خلصت الحدوتة 

طب ماتيجوا نجرب نرجع تانى زى زمان ونبسط كل حاجة فى الجواز 

ونجهز اولادنا بردو بس نجهزها فى حاجات تانية اهم من النيش و الذهب وعدد الملايات والفوط والقايمة اللى بنولع فى بعض بسببها  

طب نجهز العرسان ازاى صح 

 البنت

ازاى نجهز البنت انها تكون زوجة وأم في المستقبل ؟

اولا نجهزها تكون انثى بجد داخليا وخارجيا ونعلمها تصلح الخلل اللى جواها واللى بيعكس لها عرسان مش مناسبة اصلا من البداية

 ونعلمها ازاى تتعامل مع مشاكلها النفسية وازاى تتحرر منها

 نجهزها بأننا نخلى عندها القدرة على مواجهة المشاكل مش مع اول واتفه مشكلة تقول اتطلق 

نعرفها أن السعادة قرار مش انتظار ونعلمها ازاى تخلق السعادة فى بيتها ليها ولجوزها

ازاى تفهَم جوزها ازاى تفهم نفسها الاول عشان متعرفش جوزها وبس مضروب طول اليوم  

نجهز البنت ونعلمها ازاى تعتمد على نفسها وتكون مستقلة  ماديا عشان متكونش معتمدة على جوزها فى كل حاجة

هو اللى يعول وهى اللى تستنزف وتعيش اعتمادية وتخاف تتطلق عشان مش هتعرف تعيش بعد كدة خاصة لو طلعت بأطفال

نفهمها ان كتر الشكوى بتجيب مشاكل والحل اننا ندور على حل ونجرب ونغلط ودة افضل بكتير من الشكوى

نفهمها ان الراجل مش فلوس وانها مش كل ما تاخذ منه فلوس تبقى كدة بتأمين نفسها من غدر الرجالة ولا غدر الزمن زى ما بيقولوا

 لانك انت كأب او انتِ كأم لو بنيتوا شخصية صح فى بنتكوا وانتوا كده امنيتها من اى مخاوف فى دماغكوا حتى لو لا قدر الله اتطلقت حجم الوجع النفسي هيكون اقل بكتيييير من واحدة اعتمادية و شخصيتها مهزوزة

نفهمها ان الغلط بيعلم ويزود الخبرات مش تعيش جبانة وخايفة تتحرك لتغلط 

نعلمها ان الناس كدة كدة هتتكلم فيا اما تسمع بس للناجح اللى يساعدها تنجح

 يا تسد ودانها خالص عن الكل وتجرب هي بنفسها وتتعلم

نعلمها انها متكونش تابع لحد لمجرد انها بنت وانا عندها عقل فيه كل قدرات الرجل

نفهمها ان الرجل له صفات وشخصية مختلفة عنها تماما يعنى متعملهوش بطباعها هى ولازم تعرف صفاته وتدريسها كمان عشان تعرف تتعامل مع اى راجل عامة مش شرط جوزها بس

نجهز البنت ونعلمها ان الصحة والجمال مش حاجة وحشة ونعلمها ازاى تهتم بنفسها

 مش بالطبخ وتعليم طرق جديدة ووصفات ترمى دهون فى الجسم وتخليهم هما الاتنين بكروش بعد الجواز ويفضلوا يعايروا بعض 

ولو ضرورى الطبخ يبقى معملهاش ان قلب الرجل في معدته وياريت لو نعلمها تحافظ على صحتها بأكل صحى ونعودها على الرياضة والنبى عشان متبقاش بروطة بعد الجواز

نطلعها شبعانة من كل حاجة بجد

 مش كل حاجة نفسها فيها نقولها لما تتجوزى ابقى اطلبيها من جوزك هو مش الفانوس السحرى على فكرة 

وفى الاخر هتتصدم لانها هتتجوز بطاقة حرمان من كل حاجة وهو هيحس بدة ومش هيقدر يسد احتياجاتها المستمرة

كمان نشبعها حب وحنان واهتمام مش نخليها مستنية تتجوز عشان تشبع وساعتها عمرها ما تشبع لانها ولا اتعلمت تحتوى نفسها  ولا لقت الاحتواء دة من البيت

نفهمها ان الطبع يتغير وان كل اللى الحاجات اللى مش عجبانا فينا نقدر نغيرها بقرار مننا وطالما عايشين يبقى مفاتش الاوان

نفهمها ان مفيش حاجة اسمها اتجوزيه وغيريه بعد الجواز دى كدبة ضحكوا عليكى بيها عشان يخلصوا من مسئوليتك بس 

 اه الطبع يتغير فعلا بس لما هو ينوي ويقرر مش لما تنوى انت تغيريه 

يفهموها إن طالما قبلتيه كزوج يبقى طبيعى هتقبلى اى عيوب فيه ماهو انسان عادى يعنى و بذكائك تعرفى تتعاملى مع العيوب دى بعد ما تتقبلها

نفهمها ان المشكلة ليها اهل ذكر يتساءلوا فيها وعن طرق لحلها لو احترت او معرفتيش تحليها

مش للنشر ع الفيس والأهل والأصحاب وتعمل ع الراجل حفلة 

وكل واحدة تقولها اسمعى منى انا مطلقة خمستاشر مرة وعندى خبرة فى الرجالة 

نجهزها انها تكون قادرة ع الاختيار مش تقول اهو عريس والسلام عشان سنى بيكبر 

وتكون قادرة تتحمل نتيجة اختيارها معترفة أنها سبب مهم في اي خطأ يحصل مش ترمى كل حاجة على أهلها وجوزها والظروف والنصيب  

نعلمها انها زوجة مش  خدامة لجوزها وان مش كل دورها انها تأكله وتشربه واخر اليوم تكون حلوة حلاوة مصطنعة عشان بس ميبصش بره كل ده بيحصل بس بحب مش بفرض لأن الزواج مودة ورحمة مش إكراه وغصب

نجهزها تبنى حياة صح مش بتدور على راجل يعيشها ويقويها وبس

نفهمها ان الزوج هو شريك له حقوق وواجبات بس هى كمان لها حقوق وواجبات وهما مش الاكل والشرب والمأوى على فكرة 

نعلمها انها ليها دور وهو له دور  ومينفعش الأدوار تتبدل علشان ميختلفش التوازن فى العلاقة

ولو معرفتش كأب ومعرفتيش كأم تجهزوا بنتكوا كدة يبقى مفيش داعى تتخلصوا من فشلكم فى تجهيزها كزوجة بشوية ملايات ونيش وذهب وراجل معاه فلوس

ويبقى عليه هو يتحمل ويربى من الاول دة لو كان هو جاهز اصلا من البداية للحياة دى  

تم إنشاء هذا المنصب مع لطيفة وسهلة استمارة التقديم. إنشاء وظيفة الخاص بك!

تقرير

ماذا تعتقد ؟

Written by Rina

تعليقات

Please Login to Comment.

Loading…

0

كيكة الشوكولاتة الخطيره

هل مريض الكبد يستطيع صيام شهر رمضان؟