في

طريقة عمل قرع العسل

سؤال عن طريقة عمل القرع العسلي

فى اكتر من استخدام القرع العسلي وهو من الحاجات المفيدة جدا حتى لو اتعمل مسلوق فقط وبيدخل ف مأكولات كتير اوى لكن أنا هنزل الطريقة التقليدية ومعظمنا بسحبها ف الشتاء لانهااكلة فيها طاقة كبيرة وبتدفى زى البطاطا بالظبط

ملحوظة

يمكن الاستغناء عن المكسرات تماما ف الاكلةونكتفى بيها بالبشاميل  

طريقة القرع العسلي بالبشاميل والمكسرات

قرعاية متنظفة ومتقطعة مكعبات وطبعا الحجم حسب رغبتك

 ( بس اعرفى معلومة أن القرع بعد التسوية بينزل من حجمه كتير لانه فيه كمية سوائل كتير هتتبخر ف التسوية يعنى الكمية اللى تبقى كتير اوى قدامك بتنزل عل. الثلث بعد السلق والتسوية الأولية

يبقى مقادير القرع

3كيلو مكعبات قرع عسلى(بعد ما يتنظف ويتقشر طبعا)

1 كوب سكر

مقادير البشاميل

4 معالق كبيرة زبدة

4 معالق كبيرة دقيق

كيلو الا ربع حليب  او لتر حليب

1 كوب سكر

كوب قشطة

مكسرات حسب الرغبة  أو

صوص كاراميل

الطريقة

1_ القرع ناخد المكعبات دى ونحط عليها الكوب ونص سكر ونسيبها عشر دقائق

بعدها هتكون نزلت شوية مية ودبلت نرفعها على النار

ونسيبها تغلى وتنزل ميتها على نار متوسطة وبعدين نهدى النار لحد ما المية تتبخر قدر الإمكان وقبل ماتتبخر اوى خدى كوباية من المية اركنيها على جنب وسيبيها تكمل تسوية لحد ماتقريبا تتسبك وطبعا هيفضل القرع ف الآخر بدون نسبة سوائل

على جانب آخر

تعملى البشاميل وهو

زبدة أو سمنة بقرى  وتحمرى فيها  الدقيق على نار هادئة وتقلب كويس من كل الاتجاهات عشان الدقيق يلف ف الزبدة كويس ومش توصلى أنه ياخد لون لا خليه محافظ على لون الزبدة ومايغمق منك بعدها نضيف اللبن ومعاه شوية من المية اللى اخدناها من سلق القرع وطبعا ممكن الاستغناء عن خطوة المية دى انا بس بعملها لتقوية الطعم وإبراز طعم القرع مع التقليب بالويسك  كويس جدا. عشان مايعملش تكتلات ونضيف السكر ونقلب كويس طول الوقت على نار هادئة حتى تماما الغليان وياخد قوام معقول ومتجانس ونضيف القشطة وترفعه من على النار طبعا طول الوقت عينك متابعة القرع وبحيث تخلصى القرع تسوية والبشاميل ف نفس الوقت

بعدها تدهنى صينية زبدة وتنزلى القرع بعد تاكدك أنه صفى تماما من السوائل أو فيه نسبة بسيطة اوى ما تضرش وتفرديه ف الصينية بسمك مش عالى يفضل يبقى رقيق 2 سنتيم كويس وتضيفى المكسرات إن وجدت لومفيش خلاص انزلى بالبشاميل بهدوء على الوش طبقة بردو مش سميكة اوى بحيث يتغطى كله وممكن لو عندك قشطة سائحة شوية ترشة رشة بسيطة على وش البشاميل تانى عشان تاخد لون دهبى

وتدخل فرن ساخن لحد بس ما تتجانس وتاخد لون مش بتقعد كتير ف الفرن لانه كله مستوى

تهدأ وتقطع دافئة ولو مفيش مكسرات ممكن ف التقديم على وش القطعة ف الطبق نرش خيوط من الكاراميل ولو فى مكسرات خلاص ممكن تقديمه بدون حاجة خالص لانه غنى جدا بكل حاجة مش محتاج

ملحوظة 1

يفضل يتعمل ف صينية التارت أو البيتزا عشان حرفها يبقى مش عالى وتريحك أثناء التقديم وبيطلع مكعب شكله حلو اكتر

ملحوظة 2

السكر يرجع لرغبتك انتى ممكن تقللى عن كدة وتوزعى الكمية بين القرع والبشاميل براحتك انا شخصيا بعمل الكمية دى بكوباية سكر واحدة لأنها دسمة كفاية ولازم نستطعم الحليب والقشطة والقرع والسكر هيغطى على اى طعم

ملحوظة3

القرع مش بهرسه وبحبه يبقى باين انه قطع او مكعبات ويكتفى أنه بيدبل كويس من السلق وتصفية السوائل منه وإلا يبقى من غير معالم وبردو لو تحبى تهرسيه مش مؤثر ع الأكلة

ملحوظة 4

يمكن اتباع الخطوات السابقة كلها مع تارت البطاطا بالبشاميل ماعدا خطوة وضع السكر مع السلق وكمان يمكن الاستغناء عن السكر تماما ووضع عسل نحل ف البشاميل حرصا على التقليل من السكر

ملحوظة 5

الاكلات دى من الأكلات الدسمة والغنية ياريت لما ناكل ناكل قطعة واحدة كفاية عشان تحافظ على صحتنا لكن لو للاطفال ف سن المراهقة أو تحت كدة يأكلو منها كويس لأنهم بيحرق كتير ومحتاجين طاقة وتغذية كويسة

ملحوظة 6

الفرن لازم يبقى توزيع النار فيه كله مظبوط عشان تاخد وش بالتساوى مش تبقى حتة وحتة وترجعى تقولى عملته طلع لونه وحش ومنقر ده بيكون عيب فرن مش عيب طريقة

وكمان لو فرضنا انه اخد لون بسرعة من جنب اتصرف ازاى

تطبقى قطعة ورق فويل وتحطيها فوق الجزء اللى تلون عشان تحميه يتحرق لحد الباقى ما ياخدنفس اللون

ملحوظة 7

ممكن بعد ماندهن الصينية بالزبدة نرشها بودرة بقسماط مطحون وننفضها زى قالب الكيك ونرش الوش بقسماط لكن مش بفضل الطريقة دى لأنها بتدى طعم العيش ف النهاية الوش وبتبعدنا عن الطعام الأساسي

فى النهاية اتمنى تكونو استفدتوا من الطريقة واتمنى تجربوها وطبعا اى كميات ممكن تستخدموها  مش شرط نفس الكمية بتاعتى بس المهم تتبعو التبريكات اللى ممكن نيوز الأكلة عشان تستمتعوا بأكلة هنية

تم إنشاء هذا المنصب مع لطيفة وسهلة استمارة التقديم. إنشاء وظيفة الخاص بك!

تقرير

ماذا تعتقد ؟

Written by lolo

تعليقات

Please Login to Comment.

Loading…

0

طريقة عمل الغريبه الناعمة

كلمات فى حب وطني.