في

رحلة مع النفس

رحلتك مع نفسك مش سهلة بس صدقنى مستاهلة

سمى الله وخدها خطوة خطوة حتى لو هتبدأ معاها من جديد

طبطب عليها وقولها هنجرب ولو مش مرتاحة هسعى انى اغير الوسيلة لطريقة تريحك

بلاش تعاملها معاملة موظف الحكومة وترمى عليها كل الملفات وتقولها خلصى كل دة حالا

حدد اسبوع بس لكل عادة جديدة ومتحاولش تشوش عليها باهداف ولا عادات تانية

خليها تركز وتستمتع وتتعلم وتتألم كمان لو حبت عشان هى نفسها تحس انك بتدلعها وبتطبطب عليها وتقولها انا جنبك متقلقيش

زى الزوجة كدة بالظبط  بتاعة (مفيش وماليش ولو مهتم كنت عرفت لوحدك)

دى بتبقى عايزة بس اهتمام وحب وسؤال مستمر عنها وعن نفسيتها ومزاجها ومشاركتها دايما وعشان دة مبيحصلش  فبتلوى بوزها عشان بس تقولها مالك فتحس انها موجودة ومتشافة

بتبقى عايزاك تقولها ولا يهمك، انا جنبك ، انا اسف ، انا بحبك

اهى نفسك بقى زيها بالظبط عايزة اهتمام بس منك انت عشان لما مش بتديها الاهتمام مبتهداش وتفضل تدور عليه فى اى مكان ومع اى حد وترجع فى الاخر تلومها وتقولها انتِ معندكيش كرامة وتلوم وتلوم لحد ماتسوء العلاقة بينكوا ويبقى اول حد بتكرهه هو انت

جرب بس تروي عطشها للحب والحنان والاهتمام مش هتخسر حاجة بس حب بجد مش تمثيل

لو شايفها وحشة اشفق عليها وانوى تساعدها واحضنها

ولو شايفها حلوة شجعها وامدحها وبردو احضنها

جرب وجرب وجرب وعدد وسايلك واتعرف على كل وسيلة وشوف رد فعلها اتبسطت ولا لأ  واصبر عليها عشان اللى عملته فيها مكانش فى يوم ولا شهر دى سنيييين عمرك كله بتيجى عليها ووصلت انك تهينها بمصطلحات عنيفة

انا غبى  ، انا حمار ، انا معنديش دم ، انا فاشل …..وغيرها كتير لدرجة ان اللى حواليك كمان صدقوا دة وبقوا يوصفوك كدة

من هنا هتشوف التطوير والتغييير اللى انت عايزه فى حياتك ومكنتش عارف تحققه

يلا انوى وجرب وشوف كل يوم او كل اسبوع تقدر تقدملها ايه يفيدها وهتقدمه ازاى

واقولك على نصيحة لو هتدخلها عادة جديدة جرب تعملها كل يوم بطريقة مختلفة وابتكر

تم إنشاء هذا المنصب مع لطيفة وسهلة استمارة التقديم. إنشاء وظيفة الخاص بك!

تقرير

ماذا تعتقد ؟

Written by Rina

تعليقات

Please Login to Comment.

Loading…

0

الشمس لم تسقط كورونا والخوف يسيطر على الجميع

اكتفاء